Kaash main bharat mein hota

**This poem was written in 2011 when my hubby was feeling low and was missing India. We all do after coming abroad and some days feelings are strong and love of our family tries to pull us. This was my attempt to write his feelings in words.

Kaash main Bharat mein hota

 

Har roz mujhe yeh lagta hai

Ki kaash main bharat mein hota

 

Mana maine paya hai bahut yahan

Naam kaam vaibhav aur dhan

Lekin anjano mein yaaro

Dhoondhe se mile na apnapan.

 

Har roz mujhe yeh lagta hai

Ki kaash main bharat mein hota

 

Aisa lagta hai kahin aur main hoon

Mitti ki woh khusboo hi nahi

Kitni koshish bhi kar loon main

Yeh desh apna lagta hi nahi

 

Jis ghar mein ma ka pyaar na ho

Papa ka jismein dulaar na ho

Bhai behno ka saath na ho

Woh ghar to hai par naam ka hai

 

Har roz mujhe yeh lagta hai

Ki kaash main bharat mein hota

 

Hoton pe muskaan liye

Yaadon ke jharokhe aate hain

Woh baat alag hai yaaron ki

Aankhon ko num kar jaate hain

 

Galiyon mein ghooma karte they

Sabzi waalo se ladte they

Bees ka nahi dus ka do…

Kabhi hum bhi jhak jhak karte they

 

Chaat pakodi khaate they

Bandar ki topi laate they

Vish amrit khela karte they

Aur hum na kisi se darte they

 

Har roz mujhe yeh lagta hai

Ki kaash main bharat mein hota

 

Baithey yahan hain aaj jo hum

Hai yeh ma ki daant ka fal

Usko kya pata tha chod ke hum

Chal deinge uska hi anchal

 

Jis ma ne humko pala hai

Har mushkil se nikala hai

Uska daman hum chod chale

Jab humko usne pukara hai

 

Har roz mujhe yeh lagta hai

Ki kaash main bharat mein hota

 

Jis desh ne itna pyaar diya

Jin apno ne dulaar diya

Unko bhool ke baitha hoon

Apni duniya mein rehta hoon

 

Jab sochta hoon kya hoga kal

Darr lagta hai yeh soch ke bhi

 

Ma baap kahan mere jaayeinge

Kya hoga bachchon ka bachpan

Sanskaar kahan se aayeinge ?

Dadi nani ka pyaar dulaar

Mere bachche kahan se payeinge?

 

Har roz mujhe yeh lagta hai

Ki kaash main bharat mein hota

 

Ab tak maine apna hi socha

Kabhi na socha apno ka

Apne sapno ke chakkar mein

Na socha apno ke sapno ka

 

Har roz mujhe yeh lagta hai

Ki kaash main bharat mein hota

 

Man karta hai ab mera

Sara pyaar wapas lautane ka

Jis dekh ne mujhe saksham kiya

Us desh ko uncha uthane ka

 

Jeejaan se mehnat karni hai

Apno ka sapna sajana hai

Apne desh ka karz chukana hai

Mujhe bharat wapas jana hai

 

 

*******************************************************